فيلسوف السينما المصرية المخرج امير رمسيس:استفدت من عملي كمساعد مخرج لخمس سنوات متتالية

فيلسوف السينما المصرية المخرج امير رمسيس:استفدت من عملي كمساعد مخرج لخمس سنوات متتالية

حاوره الفنان:اكرم الكراني

انتهزنا فرصة وجودنا مع المخرج العالمي امير رمسيس عبر منصات التواصل الاجتماعي ودردشنا معه بخصوص عدة قضايا فنية..كما انتهزنا الفرصة لمباركته بالعام الميلادي الجديد وقرب عرض فيلمه الجديد(انف وثلاثة عيون)

في البداية سالناه. ..

عملك كمساعد مخرج خمس سنوات كاملة..بعد تخرجك من المعهد سنة 2000 مش فترة طويلة لمخرج موهوب زيك خاصة وان اليومين دول الكل بيشتغل مخرج علي طول..وخاصة انك تتلمذت علي يد العبقري جو…احكيلي عن كواليس الخمس سنين دول؟؟؟

_

بخصوص عملي كمساعد مخرج اولا ده كان طبيعي وقت ما بدات لان مسئولية اخراج فيلم سينمائي في زمن الفيلم الخام قبل الديجيتال كانت اكبر بكتير و تحتاج خبرة و تعلم في حين ان دلوقتي المخرج اسهل انه

يترك للتكنولوجيا دفة العمل

زمان كان لازم تبقى عارف كويس انت بتعمل ايه في كل لقطة

و طبعا بما ان شاهين مخرجي المفضل مكانش فيه حلم اكبر من اني في يوم اشتغل معاه مساعد و فعلا اتعلمت منه كتير في السينما و الحياة

و شاهين كان معطاء جدا منه اتعلمت ازاي الفيلم بيتحضر خطوة خطوة قبل التصوير و دي كانت حاجة مفتقدة جدا في السينما المصرية ازاي يكون عندك فكرة و سبب لكل مشهد و لقطة

_________

اربع سنوات غالبا تستغرقها كمسافة زمنية بين كل فيلم واخر…هل هو قلة افكار وسيناريوهات..ولا مشاكل في التنفيذ..؟

__

اعتقد ان طول الفترة بين كل فيلم و التاني له علاقة بشكل اساسي بانشغالي بعالم المهرجانات و ده كان عامل في قرار التوقف السنة دي و استقالتي من القاهرة او احد اسبابها

________

السؤال الثالث

راي سيادتك ايه في كتاب السيناريو الحاليين بالوسط …وهل هم سبب رداءة بعض الاعمال المعروضة مؤخرا..ام ان العاتق يقع علي كتف المخرج علي الارجح؟؟

___

بالعكس انا شايف ان عندنا كتاب كتير متميزين جدا و موهوبين و عندنا سيناريوهات كتير رائعة بس عندنا استسهال في تقديم نوعية واحدة او اتنين فيه اعتقاد انها بتعجب الجمهور جدا و للاسف حتى مش بنحاول ان نجيد في صناعة تلك الانواع المحبوبة الا فيما ندر الكوميديا مثالا ازاي بنحولها لاسكتشات

________

السؤال الرابع…

حضرتك قمت بتنفيذ مسلسل واحد فقط في مشوارك الفني..

هل خيال السينما مغري اكثر من واقعية التلفزيون…ام ان للمخرج امير رمسيس اسرار يخفيها؟

_

الحقيقة انا عملت مسلسلين لان اول مسلسلاتي كان في المغرب من سنين و كان تجربة نجحت جدا عند عرضها في المغرب من باب الدقة طبعا انا ميال اكتر للفيلم السينمائي لكن لا يمنع ان المسلسلات بتطورها الحالي و اقترابها من لغة السينما خلتنا نبقى قادرين نحكي حكايات حبكتها قد تكون اعقد من ان تحكى في فيلم ساعة و نصف

_______

السؤال الخامس..

راي سيادتك في هذه الاسماء:

كل مخرج قم بوصفه في كلمة..

المخرج شريف عرفة

المخرج مروان وحيد حامد

المخرج رافت الميهي

المخرج رضوان الكاشف

العبقري داوود عبد السيد

العبقري خيري بشارة

__

طبعا الاسامي اللي ذكرتها كلها اسماء عظيمة في مختلف الاجيال و استاذ خيري و استاذ داود تحديدا اثروا جدا في تكويني و اضيف ليهم طبعا الاستاذ الكبير يسري نصر الله

________

السؤال السادس…

ايهما تفضل خيال المخرج امير رمسيس…

ام حسم وقرار مدير مهرجان القاهرة السينماءي الدولي..

وايهما ينمي شخصية الاخر؟

__

الحقيقة انا ادرت مهرجان القاهرة و كنت مدير فني لمهرجان الجونة بروح المخرج و ليس الموظف و اظن ده انطبع على برمجة و خيارات الافلام و تحديدا في دورة مهرجان القاهرة الماضية اللي ضمت اكبر اعمال السنة و حتى الدورة اللي الغيت ما اعلنناه من افلام مش صدفة ان نصف الافلام اللي في قائمة الاوسكار لافضل فيلم دولي كان الجمهور المصري ح يشوفها في القاهرة كما اعلننا عنها مسبقا .. لكن في الاخر المقارنة بالنسبة لي محسومة و الاولوية للاخراج

________

السؤال السابع …

احكي لجمهورك اشهر موقفين مع العالمي شو واهم نصايح لقنها اياك

__

اعتقد اهم مواقف بيني و بين شاهين اكتر من اني الخصها بس بافتكر دايما لما كان يعمل شوط ينبسط منه و انا كمساعد بحاول اثبت اني شاطر باجري انفذ اللي بعده و هو ساعتها قالي جملة مبنسهاش : متعتك انك عملت حاجة حلوة جزء من العمل نفسه مش لازم نجري طول الوقت .. استمتع لان رحلة صناعة الفيلم هي المتعة الحقيقية مش لما الفيلم يخلص

الموقف التاني و انا باشتغل على شريط الصوت الخاص باسكندرية نيويورك مع مهندس الصوت الفرنسي في باريس اقترحت عليه فكرة و ساعتها لانه اشتغل مع شاهين كتير جدا قالي هي فكرة حلوة بس شاهين لما بيبقى فيه مزيكا بتبقى اهم من اي حاجة تانية .. تعالى نجربها علشان نسمعها مرة و ننبسط لكن انا عارف جو ح يختار ايه .. عملنا التجربة و شاهين لما وصل باريس و سمعها بصلنا و ابتسم و قال :لدومينيك هنيكان مهندس الصوت انت جربتها ليه مع انك عارف انا عايز ايه .. شاورله عليه مبتسم و شاهين بصلي و قالي بقيت جرئ انت زيادة .. و ساعتها قرر انه ينفذ الفكرة لانه شافها حلوة لان شاهين في الاخر لم يكن ديكتاتور كما كان يشاع عنه

________

السؤال الثامن….الفيلم الاخير….كواليس وحكايات هل سنضطر كفنانين اللجوء الي لغة الرمز مرة اخري…خاصة وان كادرات سيادتك تذكرنا بكتابات المسرحي القدير لينين الرملي في الاستعانة بالرمز هو علي مستوي الكلمة وحضرتك كمدرسة علي مستوي الكاميرات..

___

اشكرك على التشبيه الجميل و سولء بالرمز او بغيره السينما و المسرح دايما هي محاولة من المخرج ان الجمهور يشوف العالم من عينيه و لازم يكون له وجهة نظر في كل كلمه و كل كادر و كل زاوية كاميرا بتعكس موقفه من العالم اللي بيحكيه

______

السؤال التاسع والاخير لو عرض علي سيادتك فيلم قصير وقال لك المنتج انه سوف يعرض في مهرجانات عالمية مثل كان غيره..

لكن الفيلم مدته ربع ساعة هل ستقبل بوضع اسمك عليه…

وما هي الفكرة الوارد ذكرها في هذه المرحلة كسياق للاحداث..

___

انا مش شايف الافلام القصيرة مرحلة هي اشبه بالقصة القصيرة عند الكاتب الروائي عادي انه يعود لكتابتها بعد الرواية و انا عملا فيلم قصير بعنوان مش زي الباقيين بعد فيلمين طوال ووارد اني اكرر التجربة في اي وقت

_______

واسف للاطالة علي سيادتك…

واتمني لحضرتك كل التوفيق في العمل المعروض قريبا…(انف وثلاثة عيون)

ولقد اخذت من رصيد مخزون فكرك الفني واعدت صياغته لاستحضار حوار يليق بهذه التجربة الفنية الثرية المضمون عميقة الفكر