كتائبي للنائب حنكش: وزير الثقافة الشيعي يمثلّني اكثر من النائب الماروني والراي العام القوّاتي والكتائبي لن يقبلوا بمشاريعكم.

كتائبي للنائب حنكش: وزير الثقافة الشيعي يمثلّني اكثر من النائب الماروني والراي العام القوّاتي والكتائبي لن يقبلوا بمشاريعكم.

وجّه الاعلامي والباحث السياسي المنتمي الى حزب الكتائب طومي الجميّل رسالةً صوتية الى النائب الكتائبي الياس حنكش جاء فيها:”

انا بعرف انت يمكن تقلي انو هالمادة يمكن ما خصها بالترويج وبمجتمع الميم لانو نحنا منعرف انو بكل دول العالم بلشت بهيك مادة وصار ينطلب اكتر واكتر واكتر، وانا وياك منعرف انو هالشي مطلوب منّا من ال IMF ، وانا وياك منعرف انو انتو متكلين على النواب السنّة والشيعة انو هني ما يقطّعوا هيدي المادة وتقولوا ما قطعت من النواب السنة والشيعة، بس مش هون المشكلة، هيدول منعرفن، المشكلة انو في رأي عام اليوم قرفان من هيدا الوضع، رأي عام خلينا نقول قوتجي كتائبي قرفان من هالوضع، والشباب اكيد مش رح يرضوا يتغير وج الحزب ويتغير وج مجتمعنا ونصير نحنا مجتمع ما عندو قيم وما عندو اخلاق، بعرف شو رح تقلي ورح قلك وبرجع بقلك هيدي مقدمة لتشريعات اخرى بدا تجي بعدان لانو رح ينطلب منكن تشريعات تانية وتالتة ورابعة، وانا بتعرف شغلة؟ انا بتعرف شو بحزّ فيي؟ انو وزير الثقافة الشيعي بمثلني اليوم اكتر من نايب ماروني لأنو حكي القيم يلي انا بآمن فيا ويلي ربيت عليا، مش قصة ربيت عليا، في مجتمع متل ما هوي وجيل متل ما هوي ربي عليا، وما رح نقبل ابداً انو تُمسّ هيدي القيم لو شو ما بدا تكلفنا، منطلع عالإعلام منطلع، مننزل عالطريق نتظاهر رح ننزل، نحنا عنا قيمنا وكنيستنا ومبادئنا، هيدول خط احمر ما منقبل حدا يدق فين، برجع بقلك بدو يكون gay يقعد بالبيت يتغيغن لحالو ما عنا مشكلة معو بس ما حدا يجي يفرض علينا وعمجتمعنا قيم تتناقض مع شو نحنا تعلّمناه. انت رح تقلي ما ليك البابا شو قال، البابا كان واضح البابا قال هيدي خطيئة. شو يعني؟ نحنا منعرف يلي بيخطي لوين بيروح، والبابا قال نحنا منمنع نزوّجن، نحنا معو للبابا بلّلي قالو، انتو عم تحوْرو كلام البابا تدّافعو عن حالكن لانو عارفين حالكن مغلّطين.”

وقد وصلت هذه الرسالة الى الوزير المرتضى فردّ عليها بتغريدة جاء فيها:

“عزيزي أ. الجميّل،

وزير_الثقافة يشرّفه انّه يمثّلك ويمثّل كل لبناني واعي حرّ ومتمسّك بالقيم التي هي الركيزة الاساس والضمانة الصلبة لخلاص المجتمع اللبناني.

كل الاحترام لك ولمقاربتك ووعيك ومنطقك السديد…ونؤكّد معك ان السبب الموجب لهذا الوطن يتلخّص في ان نعيش فيه سوياً مسلمين ومسيحيين وان تكون قيمنا الجامعة هي الركائز المتينة لمجتمعٍ انساني صالح…هذا هي نظرتنا الى المسألة اما “هم” فمن حيث يدرون او لا يدرون يخدمون مشروع الصهيونية التي تستهدف لبنان وتجهد لأن يخسر قيمه وصيغة العيش معاً لأنّه النقيض لإسرائيل العنصرية المتهتّكة الساقطة اخلاقياً والتي لا راحة لها-كما قال الاب جورج حبيقة الرئيس الفخري لجامعة الكسليك- قبل ان تقضي هي ومن وراءها على قيمنا وعلى الصيغة اللبنانية النقيضة لها.

لبنان باقٍ بقيمه وصيغته الفريدة امّا مشاريعهم فساقطة مثلها مثل اصحابها مأجورين كانوا ام مضلَلين.”